Тил – калыктыҥ ӧзӧги деп тегиндӱ айдылбаган. Тилди чеберлеп, оны ичкери ӧскӱрип, берилген jайалтазын тузаланып, ӱлгерлик jолдыктарын бичип турган Аржан Сергеевич Такысовтыҥ jаҥы чыккан бичигине учурлалган jайаандык туштажу-эҥири ӱлӱрген айдыҥ 11-чи кӱнинде М. В. Чевалковтыҥ адыла адалган эл библиотекада ӧтти. Таныштыру-презентация «Jеримниҥ jылузы jӱрегимде» деп ӱлгерлик jуунтызыныҥ адыла адалган.
Поэттиҥ чӱмдемел иштеринде тӧрӧл тилдиҥ салымы алтай калыгыла, алтай jериле тудуш болгоны jарт кӧрӱнет. Темдектеп алзабыс «Алтай тилим» деп ӱлгеринде тӧрӧл алтай тилдиҥ учурын бийик тоогоны ла баалаганы кӧрӱнет.
…Каjу кайада jайылган мӧштӧрдий
Тазылыс кату, тайкылбай турактар.
Сакыбас jанынаҥ соккон салкынга
Сӱрнӱкпей, тилисти jылыйтпай тудактар.
Тӧмӧн тӱжерге jеҥил де эмей,
Тӧрӧл тилисти кӧдӱрип чыгактар.
Тӧҥӧзӧк-оро туйуктаар да эмей,
Тӧжиске чӧҥӱп, jӧмӧ базактар.
Кабайда балага карузып, кожоҥдоп,
Кайылбас тилисти кӧксине салактар.
Кӧжӧгӧ тудунган албаты jаҥарлаар,
Кийнинде тилисле оморкоп турактар… (26.01.2024 j.)
Бӱдӱрип турган ижиле, Аржан Сергеевичке алтайыныҥ сындарыла, ар-бӱткениле jаантайын jоруктаарга келижет, оныҥ учун ӱлгерлеринде баштапкы jерде Алтайына ла ар-бӱткенине сӱӱжи. Jе, jуук улузына, эжине, балдарына, аҥылу jуучыл оперцияда турушкан jуучыл нӧкӧрлӧрине учурлалган ӱлгерлери база кӧп. Оныҥ ӱлгерлери кажы ла кижиниҥ бойыныҥ сезилген ич-кӧрӱмин, санаазын чыгара айдып бергендий. Кажы ла кижи jӱрегине jуук ӱлгерди табып алар.
Тил байлыгы учун бис каруулу, келер ӱйелер бойыныҥ бала-барказына эрјине энчи артыргызары бистеҥ камаанду деп Аржан Сергеевич jарт билип, jаш ӱйеге, jииттерге тереҥ шӱӱлтелӱ ӱлгерлерин эмди де кӧп сыйлаарында алаҥзу jок, оныҥ учун jайаан ижинде jедимдер, эмди де кӧп бичиктер ле быйанду кычыраачылар кӱӱнзейдис.
Карыкчыл кӱндерде кайыр кайанаҥ
Кайып учурга jеҥил де эмей.
Кары кайылбас сӱттий сындардаҥ
Канатту ӱлгерлер тизилген де эмей.
Кӧрӱжиҥ jетпес кӧгӧргӧн туулардаҥ
Кӧксимде jӱрегим ооктолып согулды.
Кӧкӱп тӱшкен кӧпӧгӧш карлардаҥ
Кӧндӱре бичийтен jолым ачылды. (28.03.2024 j.)
