Иван Петрович Кочеев – прозаик, поэт,  СССР-диҥ Бичиичилер биригӱзиниҥ турчызы. Ада-Тӧрӧл учун Улу jунныҥ туружаачызы. Иван Петрович 1912 jылда чаган айдыҥ 31-чи кӱнинде Шабалин аймактыҥ Мыйту jуртында чыккан. Ойрот-Тураныҥ, Абаканныҥ ӱредӱчилер белетеер техникумдарында ӱренген. 1955 jылда Горно-Алтайскта ӱредӱчилердиҥ институдын божоткон.

1947 jылдаҥ ала Иван Кочеев бойы ӱлгерлер чӱмдеп, куучындар ла очерктер бичип баштайт. Оныҥ баштапкы «Чӱмеркек бака» деп балдарга учурлалган jуунтызы 1957 jылда чыккан. Албаты jылу уткыган куучындардыҥ тоозында «Адучы», «Пыйма ӧдӱктӱ куш», «Митяш», «Чедирген», «Шулмузак», оноҥ до ӧскӧ чӱмдемелдер чотолот.

«Шулмузак» деп чӧрчӧк кептӱ куучында автор балдарга Алтайдыҥ аҥ-куштарыныҥ кылык-jаҥын, олордыҥ jӱрӱмин ле аҥылу темдектерин, Алтайдыҥ ар-бӱткениниҥ jаражын, jӱзӱн-jӱӱр ӧзӱмдериниҥ аттарын jартап берет.

Кӱндӱлӱ кычыраачылар,  Иван Кочеевтиҥ «Шулмузак» деп бичигиле таныжыгар!