1990 јылдыҥ сыгын айында «Солоҥы» деп журнал баштапкы катап кепке базылып чыккан эди. Журнал јылына тӧрт катап чыгып, балдарды алтай калыктыҥ оос-јайаандыгыла, бичиичилердиҥ чӱмдемелдериле, Алтайыстыҥ јебреннеҥ бери тӱӱкизиле таныштырып јат. Онойдо ок ар-бӱткен, аҥ-куштар керегинде јилбилӱ јетирӱлер база јарлалат. Быјыл, 2025 јылда, «Солоҥы» журнал 35 јажын темдектеп јат.

Краеведение бӧлӱктиҥ ишчилери журналдыҥ юбилейлик јылдыгына башка-башка јылдардыҥ номерлеринде чыккан балдарла ойто катап туштажып, кыскачак, је јилбилӱ берилтелер салып турар.

Бӱгӱнги јетирӱ 1995 јылдыҥ 4-чи номеринде јарлалган јурукчы Айана Мундукина керегинде болор. Ол тушта бу кыс каланыҥ 7-чи таҥмалу школыныныҥ 8-чи клазыныҥ ӱренчиги болгон. Алтынчы класстаҥ ала јуранарыныҥ сургалына јӱрӱп, Волгоград калада Улу Јеҥӱниҥ 50 јылдыгына учурлалган јиит јурукчылардыҥ «Вера, Надежда, Любовь» деп кӧрӱ-маргаанында туружып, јеҥӱчил болуп чыккан.

Бу јуукта Айана Анатольевнала телефон ажыра куучын ӧткӱрип, бӱгӱнги кӱнде ишмекчи јолы, амадаган санаалары керегинде уктыс.

«1995 јылда кӧрӱ-маргаанныҥ јеҥӱчили болуп, ол тушта сургалдыҥ башкараачызы болгон В. Н. Костинле кожо Волгоград калага барып јӱргенис. Меге, ол тушта јеҥӱчил болуп чыкканым, јаан калага барып келгеним јерге батпас ырыс болгон.
Јайаандык ижимди оноҥ ары улалтып, Бийск каладагы ӱредӱчилер белетеер университеттиҥ јуранарыныҥ ла дизайнныҥ факультедин эрчимдӱ божотком. Кайра тӧрӧл Горно-Алтайск каламга јанып, јирме јылдаҥ ажыра јуранарыныҥ сургалында эрчимдӱ иштеп турум. Сургалда јурук, живопись ле композиция ӱредип тургам. Балдарла кожо башка-башка ууламјыларла јуранып турус: ӱредӱзин јаҥы баштап тургандарла чӧрчӧктӧр, соојыҥдар, тӱӱкилик темалар ла литературалык бичимелдер аайынча јуранадыс. Ӱренчиктерле ар-бӱткенге барып, Алтайысты јураарын сӱӱйдис».