Чуйдыҥ суузында телекейлик кемдӱ маргаандар баштапкы ла катап 1989 jылдыҥ кӱӱк айыныҥ 1-7 кӱндеринде ӧткӧн. Быjыл ого туй ла 35 jыл толуп jат.

Туулу Алтайдыҥ jаан агын суузын «бактырарга» ол тушта ӧскӧ тергеелердеҥ сӱрекей кӧп туристтер келген. СССР-дыҥ кемечилери суудагы спорттыҥ эмди Россияда ла jер-телекейде элбеде jарлалган рафтинг деген бӱдӱмиле баштапкы ла катап шак мында танышкандар. Одус беш jыл мынан кайра ӧткӧн Чуя – раллиде jербойыныҥ эл-jонына ла суула jӱзеечи туристтерине, ончозы солун ла jилбилӱ болгон. Чуй суудагы телекейдиҥ кубогы орус Михаил Колчевниковтыҥ ла американ Джиб Эллисонныҥ баштаҥкайыла ӧткӱрилген.

Бӱгӱн тӱӱкилик учурлу бу маргаандарга ойто катап бурылып, оны эске алынадыс.

Суула jӱзеечи туристтер Алтайдыҥ сууларыла 50-чи jылдарда jилбиркеп баштагандар. Байдаркала маргаандар дезе Себиниҥ суузында 60-jылдардыҥ учында ӧткӧн. 70-чи jылдарда туристтер баштапкы ла катап Аркыттыҥ, Башкаустыҥ, Чолушманныҥ ла Чуйдыҥ сууларыла агып тӱшкендер.

1989 jылда Чуйдын суузында телекейдиҥ кубогы учун маргаандар Чибит јурттыҥ јанында ӧткӱрилген. Сыйды ойноп алары учун СССР-дыҥ 14, гран ары jанынаҥ 19 командасы тартышкан. Горно-Алтайсктыҥ «Алтай – рафт» ла «Алтай – ГАГУ» командалары эмди рафтингле Россияныҥ, Европаныҥ ла телекейдиҥ кӧп катап чемпиондоры.

35 jылдык телекейлик маргаандар «Чуя – ралли» быjыл Онгудай аймакта, 8 майда 2024 jылда темдектелген. Ондо 133 спортсмендер ле «Чуя – ралли – 89» ветерандары, 6 регионноҥ турушкылаган.

Тузаланган литература:

1. Адаров, А. Алтыгы-Бакада амыр-энчӱниҥ лагери: [Чуя-раллиге – 30 jыл] // Алтайдыҥ Чолмоны. - 2019. - 30 апр. (№32). - С. 8-9.
2. Адаров, П. «Алтай – 89»: амыр – энчӱниҥ, телекейлик лагери // Алтайдыҥ Чолмоны. - 1989. - 17 май (№93). - С. 4.
3. Адаров, П. Телекейдиҥ кубогы учун маргаандар // Алтайдыҥ Чолмоны. - 1989. - 11 май (№89). - С. - 4.
4. Иванов, И. «От Манжерока до Чибита»// Алтайская правда. - 1989. - 23 апр. (№93). - С. 3.
5. Кочнева, М. Мы все люди, очарованные бурной водой». Яркие моменты «Чуя-ралли – 2024» на Алтае: 
6. Кузьмина, Л. «До встречи друзья» так хочется верить, что она состоится/ // Алтайская правда. - 1989. - 18 мая (№113). - С.4: фото.
7. Миронова, Г. На воде соперники, на берегу – друзья: Чуя – ралли. 35 лет // Звезда Алтая. - 2024. - 22 мая (N 20). - С. 8: фото, цв.
8. Яхонтов, С. Сохраним планету для внуков «Алтай – 89»: хроника дружбы // Алтайская правда. - 1989. - 6 мая (№104). - С. 1: фото.