Информационная рубрика «Из истории Ойротии»

Павел Васильевич Кучияк алтай театрдыҥ тӧзӧӧчизи, оныҥ баштапкы режиссёры, драматург, актёр, бичиичи. Павел Васильевич 1897 jылда тулаан айдын 17 кӱнинде Эликманар аймактын Куйум jуртында jокту биледе чыккан. 1925-1928 јј. Москвада Кӱнчыгыштыҥ ишмекчилериниҥ университединде ӱренген. Мында ого литературага ла кеендикке кирер јол ачылган. 1930-чы јылдарда Павел Васильевич кӧп ӱлгерлер, туујылар, куучындар, повестьтер, пьесалар бичиген, алтай чӧрчӧктӧрди јууп чыгарган. «Алтын таҥдак јарыды» деп туујызы 1936 ј. јарлу орус бичиичи М. Горький белетеп чыгарган «СССР-дыҥ албатыларыныҥ чӱмдемели» деп антологияны ачат. 1934 ј. П.В.Кучияк СССР –дын бичичилер Бирлигиниҥ баштапкы съездиниҥ ижинде турушкан, ол ло jыл бичиичилер бирлигине кирген.

Бичиичи бойыныҥ jӱрӱмин, ижин кӱнлигинде чокым jарт бичиген.П.В. Кучияктыҥ кӱнлигинде   бичигенинде амыраар ӧйин канайда ӧткӱрип турганы,чӱмделге ижин, театрла колбулу jорыктарын кӧргӱскен. Павел Васильевич албатынныҥ чечен сӧстӧрин бийик баалап,олорго jаан аjару эдип, кандый ӧйдӧ айдылганын чокым темдектерле кӧргӱзет.1936 jылда,17 майда ол айдынат: «Мен, Ийт-Кулак деп атту бойым,советский писатель болгоным мындый кӱндӱлӱ jӱргенимди кӧрӧр болзо,большевик партияныҥ, совет башкаруныҥ  шылтузы болды.Азып jӱрген бойыма jол кӧргӱсти,караҥуй jӱрген бойыма кӱн чалытты.Совет башкару мени писательге jетире ӱреткен керегинде ол кӱндӱлӱ атты артатпай,тобракка тӱжӱрбей,ӧрӧ бийик тударга керек болуп туру».Анайда, Новосибирде ле Москвада алтай чӧрчӧктӧр кепке базылып чыгат,оос поэзия jууп jат,орус тилден алтай тилге кӧп чӱмдемелдер кӧчӱрет,ол тоодо А.Коптеловтыҥ «Улу кӧчӱш»,бойы сӱрекей кӧп кычырынып,ол ок ӧйдӧ чӱмдеп jат:лирикала,прозала,драмала.Jаныс кижи кыска ӧйдиҥ туркунына чокымдап айткажын,10 ло jылга мындый jаан иш бӱдӱргени кайкамчылу ла оморкодулу.