Кӱндӱлӱ кычыраачылар! Эл-јонныҥ сӱӱген бичиичизи, алтай литератураныҥ классигиниҥ Лазарь Кокышевтиҥ чыккан кӱнинде алтай тилдиҥ Кӱни темдектелет. Тилисти чеберлеп ле ӧскӱрип барар амадула бу байрам 2014 јылдаҥ бери ӧдӧт. Алтай тил ада-ӧбӧкӧбистиҥ артырып салган энчизи, Алтай Республиканыҥ база бир государстволык тили болот.

«Ару, јараш тилисте –
Алтайымныҥ чырайы.
Байы оныҥ кӧгӱсте,
Алып оны јӱреели…» деп јарлу поэт Кӱлер Тепуков ӱлгеринде бичиген эди.

Ада болгон алтай тилистиҥ, эне болгон эрјине тилистиҥ Кӱниле ончо кычыраачыларды уткуп, алтай тилисле бичилген бичиктерди кӱӱнзеп кычырзын, тилисти сӱӱп, оныла оморкоп, тооп jӱрзин деп кӱӱнзейдис!

Бу кӧдӱриҥилӱ кӱнде М.В. Чевалковтыҥ адыла адалган Эл библиотекада Лазарь Васильевич Кокышевтиҥ бюстына чечектер салынар, XV-чи Краевед кычырыштар, алтай тилге учурлалган кӧрӱ-выставкалар, акция ла викторина ӧткӱрилер.