Балдарга учурлалган «Солоҥы» журналдыҥ быјыл толгон 35 јажыла колбой, оныҥ баштапкы номерлеринде бичимелдерин јарлаган ол тушта оогош чӱмдеечилер бӱгӱн кайда иштеп, јӱрӱмде кандый јол талдап алганыла таныштырарын краевед бӧлӱк улалтып туру.

Ыраак 1992 јылда кепке базылган «Солоҥыныҥ» 2-чи номеринде Эмилия Тадыкина деп кызычактыҥ тӧрт тӧртјолдык ӱлгери чыккан. Эмилия олорды јылдыҥ ӧйлӧрине учурлап бичиген болгон. Бичиктер сӱӱген биледе ӧскӧн кызычакка энези эҥирлер сайын алтай бичиктер кычыратан. Анайып, таныктарла таныжып, школдоп баштайла, кызычак бойы ӱлгерлер бичиириле јилбиркеген.

Школдыҥ кийнинде Барнаул калада университетти божодоло, 2006 јылда ол Чибилӱ јуртта географияныҥ ӱредӱчизи болуп иштеп баштаган. 2014 јылда Эмилия Лазаревна Санина школдыҥ директорына кӧстӧлгӧн.

 – Эш-нӧкӧримле кожо ӱч баатыр уулчак чыдадып турубыс. Сок јаҥыс алтай журналыс кепке базылып, ак-јарыкка чыгып турганы јакшы эмей. «Солоҥы» журнал болчомдорысты сӱӱндирип ле турзын деп кӱӱнзейдим! – деп, Эмилия Лазаревна куучындады.