Эл драма театрда кайчылардыҥ албатылар ортодо ӧткӧн Курултайында М.В. Чевалковтыҥ адыла адалган эл библиотеканыҥ краевед бӧлӱгиниҥ ишчилери туружаачыларды ла айылчыларды А.Г. Калкинниҥ чыкканынаҥ ала 100 јажына учурлалган «Алтайдыҥ мӧҥкӱлик кайчызы» деген кӧрӱ-выставказыла таныштырды.

Выставкада Алексей Григорьевич Калкинниҥ јӱрӱми ле кайга келген јолы керегинде јетирӱлер, бичикке кирген кай чӧрчӧктӧри, ӱлгерлери кӧргӱзилген.

Кӧрӧӧчилерди эҥ тыҥ јилбиркеткени – 1951 јылда кепке базылган «Очы-Бала» ла «Алтай баатырларда» кирген чӧрчӧктӧри.