Јайалталу бичиичи Сурайа Сартакованыҥ быјыл толгон 75 јажына учурлай Эл библиотекада темдектелген туштажу-эҥир бийик кеминде ӧтти.

Бу кӱн озолодо ӧнӧтийин талдалган кокыр чӱмдемелдер аайынча белетелген ойын-кӧргӱзӱлер, кычырыштар ла кожоҥдор туштажуга келген айылчыларды кӧӧрӧдип, кӱӱндерин кӧдӱре кӧкӱдип салды. «Кӧӧгӧ јетире отургызаалараар ба?» («Абралу Абрам»), «Сырмал штан», «Алдырбастыҥ санаалары» деген кӧргӱзӱлерде Ирбис Акчин ле Иван Куюков ойногон. Анайда ок басняларды ла јӱрӱмде чын болгон каткымчылу учуралдарды бичигенин чындык кычырачылары ла јерлештери В.И. Быдышева ла В.С. Юлукова куучындаган. Оогош болчомдорго учурлалган ла јараткан ӱлгерлерин кычыраачылар эске айтканы олор поэттиҥ эптӱ ле ээлгир тилин баалаганын ла сӱӱгенин кереледи. «Кызыл машина» деген сценкада тӧс рольды автор бойы ойногонын улус сонуркап кӧрди.

1990 јылдарда Сурайа Сартакованыҥ баштаҥкайыла тӧзӧлгӧн «Тастаракай» деп фольклор ӧмӧликте турушкан уулдар ла кыстар калада ӧткӧн эҥирге ончозы келип болбогон до болзо, сӱрлӱ видеоролик белетеп, таскадаачызын аҥылу уткудылар. Туштажуны Марина Саксаева кожоҥдорыла база јарандырды.