1990 јылдыҥ сыгын айында «Солоҥы» деп журнал баштапкы катап кепке базылып чыккан эди. Журнал јылына тӧрт катап чыгып, балдарды алтай калыктыҥ оос-јайаандыгыла, бичиичилердиҥ чӱмдемелдериле, Алтайыстыҥ јебреннеҥ бери тӱӱкизиле таныштырып јат. Онойдо ок ар-бӱткен, аҥ-куштар керегинде јилбилӱ јетирӱлер база јарлалат. Быјыл, 2025 јылда, «Солоҥы» журнал 35 јажын темдектеп јат.

Краеведение бӧлӱктиҥ ишчилери журналдыҥ юбилейине башка-башка јылдардыҥ номерлеринде балдардыҥ чӱмдеген јилбилӱ куучындарыла, ӱлгерлериле таныштырып тура, ӧй ӧткӧн кийнинде олорды табып, кыскачак, је јилбилӱ берилтелер айына бир катап салар.

Бӱгӱнги јетирӱ 1998 ле 2001 јылдарда журналга бойыныҥ ӱлгерлерин ийген Эжер Канарин керегинде болор. Эжер Сергеевичтиҥ чыккан-ӧскӧн јери Кош-Агаш аймактыҥ Ортолык јурты, сӧӧги тодош.

«Мен школдо 7-чи класстыҥ ӱренчиги болуп турарымда, «Чедирген» деп јиит бичиичилердиҥ ле ӱлгерчилердиҥ кружогына јӱретен болгом. Ол тушта алтай тилле јилбиркеп, ӱлгерлер, онойдо ок кичинек куучындар бичийтен эдим. «Солоҥы» деп болчомдордыҥ журналында мениҥ чӱмдеген ӱлгерлерим чыгып туратан. Журналды колго алып, бастыра бӱктерин шиҥжӱӱлеп кычыратам, јуруктарын јилбиркеп кӧрӧтӧн болгом. Оноҥ бир канча ӧй ӧткӧн кийнинеҥ ойто ло ачып, база ла кычырып туратаным санаамга кирип туру.

Тургуза ӧйдӧ мен «Чуйские зори» деп Кош-Агаш аймактыҥ газединде корреспондент болуп иштейдим. Бу газетте алтай тилле чыгып турган бӱкти белетеп турган кижи мен болорым.

Мен айыл-јуртту, ӱч бала азырап јадым. Бир уул ла 2 кыс. Эҥ огош кызычагым 10 айлу, ады Солоҥы».