Озодо Алтайда jуртаган jонныҥ курсагы балык болгон дежет. Бир катап Алтайда кӱйгек jыл болгон. Кичинек карасулар ла кöлдöр соолып, балыктар кунураган. Ачынага алдырткан улус ырада балыктап бартыр. Олор jуртты сакып отурзын деп келинди артырган эмтир. Балыктап барган улус узак келбей турарда, аштаган келин калганчы эки балыкты jип койтыр. Балыктаган улус толо азыкту jангылап келзе чууда jаш бала jaдар, келин jок. Канча кӱнге улус келинди бедиреп чöкöйлö, балазы jок билеге уулчакты берип ийген.

Бир катап уулчак балыктап jÿреле, ташка тайкылып, сууга тӱшкен. Оны кемде де чебер тудуп кучактанып, jаратка чыгарып ийген. Уулчак оҥдонып келеле кöрзö, мӱÿстерлӱ, канаттарлу, кайзырыкту, аҥ дезе - аҥ-эмес, куш дезе куш эмес, саҥ башка амыйтан бöкöйип алган турды. «Балам, коркыба менеҥ. Мен сениҥ энеҥ. Кызалаҥду jылда jарабас керек эделе, Улуу деп тынду болуп кубулгам. Ыраагынаҥ сени ле кара албатыны корылап jÿргем. Билип jӱр: сен Улууныҥ уулы, ак-чек ле jалтанбас болуп öс. Ууры, тонок, jаман кылык этпе. Бар-jогыҥла албатыҥла ӱлежип jӱр. Ол тушта сеге ырыс, тоомjы келер» деп, Улуу айткан.

Анайып, Улуу он эки jылдыҥ тоозына кирген.
________________________________________________________________

Алтай jылдык тоо: айтоолош / редактор Л. Н. Баина; художественный редактор А. П. Декенова. – Горно -Алтайск: Алтын -Туу, 2019.