Алтайыста ады-јолы јарлу бичиичи, АР-дыҥ культуразыныҥ нерелӱ ишчизи, Россияныҥ бичиичилер биригӱзиниҥ ле журналисттер биригӱзиниҥ турчызы Таукен Яйтыновтыҥ 75 јажына учурлалган туштажулар быјыл тергеебистиҥ башка-башка толуктарында ӧткӧн эди.
Сыгын айдыҥ 30-чы кӱнинде М.В. Чевалковтыҥ адыла адалган Эл библиотека тоомјылу најызын база уткыды.
«Кӧкӧрӱ алтайдаҥ, кӧбӧктӧр угынаҥ» деп адалган туштажуга кӱӱнзеп келген айылчылар ачык-јарык кӱӱндӱ, јалакай јӱректӱ, ойгор кӧгӱстӱ бӱткен јайалталу алтай алыпка кӧп јылу сӧстӧр айдып, бу кижиле кандый айалгада танышкандарын, узак јылдарга улайын најылашканын, кожо иштегенин эске алдылар.
Таукен Тазымаевичти уткыырга јаҥыс ла каладаҥ кӧрӱш-таныштары эмес, керек дезе ыраак Кӧкӧрӱ јурттаҥ тӧрӧӧн-туугандары келген. Олор – ветерандардыҥ «Байлык» деп адалган хоры болды.
Јӱрӱмниҥ база бир бийик ажузына чыкканыла уткып, оныҥ 50 јажы толордо, бичиичи Јыбаш Каинчин бичиген: «Бу бийиктеҥ јӱрӱмниҥ туулары, ӧзӧктӧри, сан-салаалары элбек ле јарт кӧрӱнет». Айдарда, Таукен Тазымаевичке эмди де узун јол, эрчимдӱ иш, бек су-кадык кӱӱнзейдис.
