1990 јылдыҥ сыгын айында «Солоҥы» деп журнал баштапкы катап кепке базылып чыккан эди. Журнал јылына тӧрт катап чыгып, балдарды алтай калыктыҥ оос-јайаандыгыла, бичиичилердиҥ чӱмдемелдериле, Алтайыстыҥ јебреннеҥ бери тӱӱкизиле таныштырып јат. Онойдо ок ар-бӱткен, аҥ-куштар керегинде јилбилӱ јетирӱлер база јарлалат. Быјыл, 2025 јылда, «Солоҥы» журнал 35 јажын темдектеп јат.

Краеведение бӧлӱктиҥ ишчилери журналдыҥ юбилейине башка-башка јылдардыҥ номерлеринде балдардыҥ чӱмдеген јилбилӱ куучындарыла, ӱлгерлериле таныштырып тура, ӧй ӧткӧн кийнинде олорды табып, кыскачак, је јилбилӱ берилтелер айына бир катап салар.

Бӱгӱнги јетирӱ «Солоҥы» журналдыҥ 1993 јылда кепке базылган 3-чи номерине бойыныҥ чӱмдеген ӱлгерлерин аткарган Эмилия Тадыкина (эмди Санина) керегинде болор. Эмилия Лазаревнаны бис јондык сетьтер ажыра табып алдыс:

«Мениҥ чыккан-ӧскӧн jерим Улаган аймактыҥ кичинек Кара-Кудюр деп jурты болор. Бистиҥ биле  кычырарын тыҥ сӱӱйтен. Энем эҥирлер сайын биске алтай бичиктер кычырып туратан, бис угуп отурарыс. Баштамы класстардаҥ ала кыскачак ӱлгерлер бичиирин сӱӱйтем. Баштапкы катап ӱлгерлерим "Солоҥы" журналда чыгарда меге тыҥ сӱӱнчи болгон деп   санаамга  jакшы кирет.

2006 jылда Барнаул калада Алтайский государственный университет божодып, Чибилӱ  jуртта географияныҥ ӱредӱчизи болуп иштеп турум. 2014 jылдаҥ бери – школдыҥ директоры.

 Эш-нӧкӧримле кожо ӱч баатыр уулчак чыдадып турус. Сок jаҥыс алтай  журналыс кепке базылып, чыгып турганы jакшы эмей. Кӱлер Эзендикович кару алтай тилиске jаан аjару эдип, алтай мультфильмдер де согуп чыгарганы сурекей jаан иш.  «Солоҥы» журнал кепке базылып, чыгып ла турзын деп кӱӱнзеп турум! Нак ӧмӧлигине су-кадык ла бийик jедимдер!».