1990 јылдыҥ сыгын айында «Солоҥы» деп журнал баштапкы катап кепке базылган эди. Журнал јылына тӧрт катап чыгып, балдарды алтай калыктыҥ оос-јайаандыгыла, бичиичилердиҥ чӱмдемелдериле, Алтайыстыҥ јебреннеҥ бери тӱӱкизиле таныштырып јат. Онойдо ок ар-бӱткен, аҥ-куштар керегинде јилбилӱ јетирӱлер база јарлалат. Быјыл, 2025 јылда, «Солоҥы» журнал 35 јажын темдектеп јат.

Краеведение бӧлӱктиҥ ишчилери журналдыҥ юбилейине башка-башка јылдардыҥ номерлеринде балдардыҥ чӱмдеген јилбилӱ куучындарыла, ӱлгерлериле таныштырып тура, ӧй ӧткӧн кийнинде ол балдарды табып, кыскачак, је јилбилӱ берилтелер айына бир катап салар.

Бӱгӱнги јетирӱ 1990 јылдыҥ баштапкы номеринде «Чӱмдеерге ӱренедис» деп рубрикага ӱлгерлерин ийген ол тушта Улаган аймактыҥ Балыкчы јуртыныҥ школыныҥ 4-чи клазыныҥ ӱренчиги Айана Кензина керегинде болор. «Солоҥы» журналдыҥ јаҥыс ла баштапкы номеринде эмес, је онойдо ок 1992 јылдыҥ журналында «Койонокко эткен сый» деп чӧрчӧги база кепке базылып чыккан эди. Айана Николаевнага (эмди Каятова) сакыбас јанынаҥ телефон согуп, амадаган санаалары, ишмекчи јолы керегинде кичинек куучын ӧткӱрдибис.

«Јаштаҥ ала кычырарыла јилбиркеер болгом. «Солоҥы» журналды јурт библиотеканаҥ кычырып турганым санаамга кирет. Мен тӧрӧл Балыкчы јуртымныҥ школын тӱгезип, каладагы техникумды божодоло, Эл Университеттиҥ филология бӧлӱгинде ӱренгем. Ӱредӱни эрчимдӱ тӱгезеле, он тӧрт јыл «Улаганныҥ солундары» деп Улаган аймактыҥ газединде корреспондент болуп иштегем. Ол ӧйдӧ куучындар, очерктер, ӱлгерлер бичип туратам. Оноҥ ары ишмекчи јолымды Улаганныҥ јурт администрациязында улалткам. Бӱгӱнги кӱнде ижим су-кадык корыырыла колбулу. Чынынча айдар болзо, бичинер бош ӧй келишпей турганыла, калганчы јылдарда чӱмдеерин таштап ийгем.

 Эш-нӧкӧримле кожо 28 јыл јуртап, батыр уул чыдадып салдыс. Уулым гитарала ойноорына јилбиркеп јат. Чӧлӧӧ ӧйдӧ уулымла кожо кожоҥдоорын сӱӱйдим».