«Тилдиҥ байлыгы» деп тизимелге Александра Федоровна Саруеваныҥ 110 јылдыгына учурлай «Мениҥ Алтайым» (1953) деп лирикалык јуунтызынаҥ алынган «канатту» сӧстӧриле алтай кычыраачыларды таныштырадыс.
КАНАТТУ СӦСТӦР
Туујычыныҥ сананып тапкан канатту сӧстӧри:
1. Сӱӱш кижи јӱрегиниҥ – јаскы кӱни
Јаан-јаштыҥ јӱрегин чечектедет.
Сӱӱш кижиниҥ ару кӱӱни –
Кӧгӱстӱди омок чындыкка кӧдӱрет.
2. Јашта кирген су-кадык сени баатыр эдер,
Јашта кирген чындык сени кижи эдер.
3. Чечек јаражы – ӧҥӱнде,
Кижи јаражы – јӱрегинде.
4. Кӧгӱстӱ кижи – кӧстӧӧн кӧрӧр,
Кӧк тенек – кийим јаар кӧрӧр.
5. Кӧгӱстӱде – шоот јок,
Кокурында – оп јок.
6. Чечек јаражы – аралда,
Кижи јаражы – санаада.
7. Кӧӧлмӧк сууныҥ – тӱби тереҥ.
Ӱй кижиниҥ – кӧгӱзи тереҥ.
8. Ак чечектӱ јалаҥ јараш,
Ак санаалу келин јараш.
9. Телеген куштыҥ учужы бийик
Эмеген кижиниҥ санаазы бийик.
10. Совет јаҥныҥ кӱни јарык
Ӱй улустыҥ кӱӱни јарык.
11. Мӧш бӱрӱнеҥ јааш ӧтпӧс,
Мӧҥкӱ иштиҥ – јалбыжы ӧчпӧс.
12. Казыр аҥ казыр кӧрзӧ, казалаарын сакы.
Канзырак ӧштӱ кекензе, табарарын сакы.
13. Икилиниҥ ӱни јараш,
Иштеҥкейдиҥ ийдези јараш.
14. Керсӱ кижини кыйа кӧрбӧс,
Келген кижини кирелеп кӧрбӧс.
15. Кижи ӧштӧгӧн – ӧчӧмӱк болор,
Кижи базынчыктаган – балјыр болор.
16. Баатыр албатыда – батыр бӱдӱмдӱ кӧп
Улу албатыда – улу санаалу кӧп.
17. Јакшы албатыда – јакшынак кӧп.
Акту албатыда – ак санаалу кӧп.
18. Ак санаалу – кӧзӱне айдар,
Кара санаалу – кийнинеҥ айдар.
19. Албаты кӱӱни – кӱн чогындый.
Албаты кӱчи – агын талайдый.
20. Кижиниҥ кӱчӱн jиген – кӱчтӱ болбос,
Кижиниҥ ижин уурдаган – улу болбос.
21. Ойгор албаты – ӧӧн чыгарбас,
Улу албаты – jуу чыгарбас.
22. Ак санаалу – ачык-jарык,
Кара санаалу – кара-туйук.
23. Турна куштыҥ учужы бийик,
Турумкай кижинин ижи бийик.
24. Кожоҥчы куштыҥ кожоҥы jараш,
Тууjычыныҥ тили jараш.
25. Канады jок куш эмес,
Тили jок тууjычы эмес.
26. Тууjычыныҥ кулагы тунза,
Jӱрек санаазыла – коолор.
Тууjычынын ӱни тунза –
Jӱрегиле кожоҥ доор.
27. Тӧрӧлине тийген ӧштӱдеҥ
Быйан сакыба, тизеге туруп jайым сураба.
28. Jаражы кижининҥ jӱрегинде,
Jакшызы – эткен керегинде.
29. Кеп сӧс кебелбес,
Кезейин дезе кезилбес.
30. Учурлу jӱрӱм jаркынду,
Учурлу иш канатту.
